Mali Defense Minister Death: ਮਾਲੀ ਦੇ ਰੱਖਿਆ ਮੰਤਰੀ ਦੀ ਮੌਤ; ਬਾਗੀਆਂ ਵੱਲੋਂ ਫੌਜੀ ਟਿਕਾਣਿਆਂ ’ਤੇ ਕਬਜ਼ਾ
Mali Defense Minister Death: ਪੱਛਮੀ ਅਫਰੀਕੀ ਦੇਸ਼ ਮਾਲੀ ਤੋਂ ਇੱਕ ਬੇਹੱਦ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ। ਜਿਹਾਦੀਆਂ ਅਤੇ ਵੱਖਵਾਦੀ ਬਾਗੀਆਂ ਵੱਲੋਂ ਕੀਤੇ ਗਏ ਇੱਕ ਵੱਡੇ ਤਾਲਮੇਲ ਵਾਲੇ ਹਮਲੇ ਵਿੱਚ ਮਾਲੀ ਦੇ ਰੱਖਿਆ ਮੰਤਰੀ ਜਨਰਲ ਸਾਦਿਓ ਕਾਮਾਰਾ ਦੀ ਮੌਤ ਹੋ ਗਈ ਹੈ। ਸਰਕਾਰੀ ਅਧਿਕਾਰੀਆਂ ਨੇ ਐਤਵਾਰ ਨੂੰ ਪੁਸ਼ਟੀ ਕੀਤੀ ਕਿ ਹਮਲਾਵਰਾਂ ਨੇ ਦੇਸ਼ ਦੇ ਕਈ ਕਸਬਿਆਂ ਅਤੇ ਫੌਜੀ ਬੇਸਾਂ ’ਤੇ ਕਬਜ਼ਾ ਕਰ ਲਿਆ ਹੈ। ਇਹ ਹਮਲਾ ਮਾਲੀ ਦੀ ਫੌਜੀ ਹਕੂਮਤ (ਜੁੰਟਾ) ਲਈ ਇੱਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ, ਜੋ ਲੰਬੇ ਸਮੇਂ ਤੋਂ ਅਲ-ਕਾਇਦਾ ਅਤੇ ਇਸਲਾਮਿਕ ਸਟੇਟ ਨਾਲ ਜੁੜੇ ਅਤਿਵਾਦੀਆਂ ਅਤੇ ਉੱਤਰੀ ਖੇਤਰ ਦੇ ਵੱਖਵਾਦੀਆਂ ਨਾਲ ਲੜ ਰਹੀ ਹੈ।
ਸਰਕਾਰੀ ਬਿਆਨ ਮੁਤਾਬਕ ਸ਼ਨੀਵਾਰ ਨੂੰ ਰੱਖਿਆ ਮੰਤਰੀ ਕਾਮਾਰਾ ਦੀ ਰਿਹਾਇਸ਼ ’ਤੇ ਆਤਮਘਾਤੀ ਕਾਰ ਬੰਬ ਅਤੇ ਬੰਦੂਕਧਾਰੀਆਂ ਨੇ ਹਮਲਾ ਕੀਤਾ ਸੀ। ਜਨਰਲ ਕਾਮਾਰਾ ਨੇ ਹਮਲਾਵਰਾਂ ਦਾ ਡਟ ਕੇ ਮੁਕਾਬਲਾ ਕੀਤਾ ਅਤੇ ਕੁਝ ਨੂੰ ਮੌਤ ਦੇ ਘਾਟ ਵੀ ਉਤਾਰਿਆ, ਪਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਣ ਕਾਰਨ ਉਨ੍ਹਾਂ ਨੇ ਹਸਪਤਾਲ ਵਿੱਚ ਦਮ ਤੋੜ ਦਿੱਤਾ। ਸਰਕਾਰੀ ਟੈਲੀਵਿਜ਼ਨ ’ਤੇ ਇਸ ਮੰਦਭਾਗੀ ਖ਼ਬਰ ਦੀ ਪੁਸ਼ਟੀ ਕਰਦਿਆਂ ਦੇਸ਼ ਵਾਸੀਆਂ ਨਾਲ ਦੁੱਖ ਸਾਂਝਾ ਕੀਤਾ ਗਿਆ।
ਕਿਡਾਲ ’ਤੇ ਮੁੜ ਕਬਜ਼ਾ ਇਸ ਜੰਗ ਵਿੱਚ ਇੱਕ ਨਵਾਂ ਮੋੜ ਉਦੋਂ ਆਇਆ ਜਦੋਂ ਪਹਿਲੀ ਵਾਰ ਉੱਤਰੀ ਵੱਖਵਾਦੀਆਂ (FLA) ਅਤੇ ਅਲ-ਕਾਇਦਾ ਨਾਲ ਜੁੜੇ ਗਰੁੱਪ (JNIM) ਨੇ ਇਕੱਠੇ ਹੋ ਕੇ ਫੌਜ ’ਤੇ ਹਮਲਾ ਕੀਤਾ। ਵੱਖਵਾਦੀਆਂ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਰਣਨੀਤਕ ਤੌਰ ’ਤੇ ਅਹਿਮ ਉੱਤਰੀ ਸ਼ਹਿਰ ਕਿਡਾਲ ਨੂੰ ਫੌਜ ਦੇ ਕਬਜ਼ੇ ਤੋਂ ਮੁਕਤ ਕਰਵਾ ਲਿਆ ਹੈ। ਫੌਜੀ ਮੁਖੀ ਜਨਰਲ ਉਮਰ ਡਾਇਰਾ ਨੇ ਵੀ ਮੰਨਿਆ ਕਿ ਮਾਲੀ ਦੀ ਫੌਜ ਨੇ ਕਿਡਾਲ ਛੱਡ ਦਿੱਤਾ ਹੈ ਅਤੇ ਹੁਣ ਉਹ ਅਨੇਫਿਸ ਸ਼ਹਿਰ ਵਿੱਚ ਮੁੜ ਤਾਇਨਾਤ ਹੋ ਰਹੇ ਹਨ।
ਇਹ ਹਮਲੇ ਮਾਲੀ ਦੇ ਮੌਜੂਦਾ ਸੁਰੱਖਿਆ ਭਾਈਵਾਲ ਰੂਸ ਲਈ ਵੀ ਵੱਡੀ ਨਾਮੋਸ਼ੀ ਦਾ ਕਾਰਨ ਬਣੇ ਹਨ। ਰੂਸ ਦੀ ‘ਅਫਰੀਕਾ ਕੋਰਪਸ’ (ਪੁਰਾਣਾ ਵੈਗਨਰ ਗਰੁੱਪ) ਇੱਥੇ ਫੌਜ ਦੀ ਮਦਦ ਕਰ ਰਹੀ ਹੈ, ਪਰ ਇੰਨੇ ਵੱਡੇ ਪੱਧਰ ’ਤੇ ਹੋਏ ਹਮਲਿਆਂ ਦੀ ਭਿਣਕ ਰੂਸੀ ਖੁਫੀਆ ਤੰਤਰ ਨੂੰ ਵੀ ਨਹੀਂ ਲੱਗੀ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਵੱਖਵਾਦੀਆਂ ਅਤੇ ਜਿਹਾਦੀਆਂ ਦਾ ਇਹ ਸਿਆਸੀ ਅਤੇ ਫੌਜੀ ਤਾਲਮੇਲ ਪੂਰੇ ਖੇਤਰ ਲਈ ਗੰਭੀਰ ਖ਼ਤਰਾ ਪੈਦਾ ਕਰ ਸਕਦਾ ਹੈ। ਰਾਜਧਾਨੀ ਬਮਾਕੋ ਵਿੱਚ ਫਿਲਹਾਲ ਰਾਤ ਦਾ ਕਰਫਿਊ ਲਗਾ ਦਿੱਤਾ ਗਿਆ ਹੈ ਅਤੇ ਸਥਿਤੀ ਤਣਾਅਪੂਰਨ ਬਣੀ ਹੋਈ ਹੈ।
