ਆਰ ਬੀ ਆਈ ਨੇ ਨੀਤੀਗਤ ਵਿਆਜ ਦਰ ਘਟਾ ਕੇ 5.25 ਫੀਸਦੀ ਕੀਤੀ, ਲੋਨ ਹੋਣਗੇ ਸਸਤੇ
ਰੁਪਏ ਦੇ ਡਿੱਗਣ ਬਾਰੇ ਚਿੰਤਾਵਾਂ ਨੂੰ ਦਰਕਿਨਾਰ ਕਰਦੇ ਹੋਏ ਆਰ ਬੀ ਆਈ ਨੇ ਆਰਥਿਕ ਵਿਕਾਸ ਨੂੰ ਹੋਰ ਮਜ਼ਬੂਤ ਕਰਨ ਲਈ ਵਿਆਜ ਦਰ ਵਿੱਚ 25 ਆਧਾਰ ਅੰਕਾਂ (basis points – bps) ਦੀ ਕਟੌਤੀ ਕਰਕੇ ਇਸ ਨੂੰ 5.25 ਫੀਸਦੀ ਕਰ ਦਿੱਤਾ ਹੈ, ਜੋ ਕਿ ਮੌਜੂਦਾ ਵਿੱਤੀ ਸਾਲ ਦੀ ਦੂਜੀ ਤਿਮਾਹੀ ਵਿੱਚ 8.2 ਪ੍ਰਤੀਸ਼ਤ ਦੇ ਨਾਲ ਛੇ-ਤਿਮਾਹੀ ਦੇ ਉੱਚ ਪੱਧਰ ‘ਤੇ ਪਹੁੰਚ ਗਿਆ ਹੈ।
ਇਸ ਨਾਲ ਹਾਊਸਿੰਗ, ਆਟੋ ਅਤੇ ਵਪਾਰਕ ਕਰਜ਼ਿਆਂ ਸਮੇਤ ਪੇਸ਼ਗੀਆਂ (advances) ਦੇ ਸਸਤੇ ਹੋਣ ਦੀ ਉਮੀਦ ਹੈ।
ਮੌਜੂਦਾ ਵਿੱਤੀ ਸਾਲ ਲਈ ਪੰਜਵੀਂ ਦੋ-ਮਾਸਿਕ ਮੁਦਰਾ ਨੀਤੀ ਦਾ ਐਲਾਨ ਕਰਦਿਆਂ ਆਰ ਬੀ ਆਈ ਦੇ ਗਵਰਨਰ ਸੰਜੇ ਮਲਹੋਤਰਾ ਨੇ ਕਿਹਾ ਕਿ ਮੁਦਰਾ ਨੀਤੀ ਕਮੇਟੀ (ਐੱਮ.ਪੀ.ਸੀ. – MPC) ਨੇ ਇੱਕ ਨਿਰਪੱਖ ਰੁਖ (neutral stance) ਨਾਲ ਥੋੜ੍ਹੇ ਸਮੇਂ ਦੇ ਉਧਾਰ ਦਰ ਜਾਂ ਰੈਪੋ ਦਰ ਨੂੰ 25 ਆਧਾਰ ਅੰਕਾਂ ਨਾਲ ਘਟਾ ਕੇ 5.25 ਫੀਸਦ ਕਰਨ ਦਾ ਸਰਬਸੰਮਤੀ ਨਾਲ ਫੈਸਲਾ ਕੀਤਾ ਹੈ।
ਇਹ ਦਰ ਕਟੌਤੀ ਖਪਤਕਾਰ ਮੁੱਲ ਸੂਚਕਾਂਕ (ਸੀ.ਪੀ.ਆਈ) ‘ਤੇ ਅਧਾਰਤ ਪਰਚੂਨ ਮਹਿੰਗਾਈ ਦੇ ਪਿਛਲੇ ਤਿੰਨ ਮਹੀਨਿਆਂ ਤੋਂ ਸਰਕਾਰ ਦੁਆਰਾ ਲਾਜ਼ਮੀ 2 ਫੀਸਦੀ ਦੀ ਹੇਠਲੀ ਸੀਮਾ ਤੋਂ ਹੇਠਾਂ ਰਹਿਣ ਤੋਂ ਬਾਅਦ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਭਾਰਤੀ ਅਰਥਵਿਵਸਥਾ ਨੇ ਦੂਜੀ ਤਿਮਾਹੀ ਵਿੱਚ ਉਮੀਦ ਤੋਂ ਬਿਹਤਰ 8.2 ਪ੍ਰਤੀਸ਼ਤ ਦੀ ਜੀ.ਡੀ.ਪੀ. ਵਿਕਾਸ ਦਰ ਦਰਜ ਕੀਤੀ ਹੈ।
