Anti-immigration protest: ਆਸਟਰੇਲੀਆ: ਆਵਾਸ ’ਤੇ ਰੋਕ ਲਾਉਣ ਦੀ ਮੰਗ ਲਈ ਰੈਲੀਆਂ
Anti-immigration protest: ਇੱਥੇ ਦੇ ਮੂਲ ਵਾਸੀਆਂ ਨੇ ਆਵਾਸ ’ਤੇ ਮੁਕੰਮਲ ਰੋਕ ਲਗਾਉਣ ਦੀ ਮੰਗ ਲਈ ਦੇਸ਼ ਦੇ ਪ੍ਰਮੁੱਖ ਸ਼ਹਿਰ ਮੈਲਬਰਨ, ਬ੍ਰਿਸਬਨ, ਰਾਜਧਾਨੀ ਕੈਨਬਰਾ ਵਿੱਚ ਰੈਲੀਆਂ ਕੀਤੀਆਂ ਗਈਆਂ। ਇਸੇ ਦੌਰਾਨ ਪਰਵਾਸੀਆਂ ਨੇ ਵੱਖਰੀਆਂ ਰੈਲੀਆਂ ਕਰਕੇ ਨਸਲੀ ਟਿੱਪਣੀਆਂ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ।
ਸਿਡਨੀ ਵਿੱਚ ਆਵਾਸ ਵਿਰੋਧੀ ਰੈਲੀ ਨੂੰ ਸੰਬੋਧਨ ਕਰਦਿਆਂ ਆਗੂ ਮਾਈਕਲ ਬਰਾਊਨ ਨੇ ਕਿਹਾ ਕਿ ਸਰਕਾਰ ਵੋਟ ਬੈਂਕ ਨੂੰ ਦੇਖ ਕੇ ਨਵੇਂ ਆਵਾਸੀਆਂ ਨੂੰ ਆਉਣ ਦੀ ਖੁੱਲ੍ਹ ਦੇ ਰਹੀ ਹੈ, ਜਿਸ ਨਾਲ ਆਸਟਰੇਲੀਆ ਦਾ ਬੁਨਿਆਦੀ ਢਾਂਚਾ ਪੁਰੀ ਤਰ੍ਹਾਂ ਨਾਲ ਲੀਹਾਂ ਤੋਂ ਲੱਥ ਗਿਆ ਹੈ। ਮਕਾਨਾਂ ਦੀ ਥੁੜ ਕਾਰਨ ਵੱਧ ਕਿਰਾਇਆ, ਬੇਰੁਜ਼ਗਾਰੀ ’ਚ ਵਾਧਾ, ਸੜਕਾਂ ’ਤੇ ਆਵਾਜਾਈ, ਜਨਤਕ ਰੇਲ-ਬੱਸਾਂ ਵਿੱਚ ਭੀੜ ਅਤੇ ਮਹਿੰਗਾਈ ਤੋਂ ਇਲਾਵਾ ਆਸਟਰੇਲੀਆ ਦੇ ਰਹਿਣ-ਸਹਿਣ ਦੇ ਮਾਪਦੰਡ ਬੁਰੀ ਤਰ੍ਹਾਂ ਨਾਲ ਪ੍ਰਭਾਵਿਤ ਹੋਏ ਹਨ। ਉਨ੍ਹਾਂ ਮੰਗ ਕੀਤੀ ਕਿ ਆਉਣ ਵਾਲੇ ਪੰਜ ਸਾਲ ਨਵੇਂ ਪਰਵਾਸੀਆਂ ਦੀ ਆਮਦ ’ਤੇ ਰੋਕ ਲਾ ਕੇ ਮੁਲਕ ਦੀ ਦਸ਼ਾ ਤੇ ਦਿਸ਼ਾ ਬਦਲੀ ਜਾਵੇ।
ਜਦੋਂ ਕਿ ਦੂਜੇ ਪਾਸੇ ਇੱਥੇ ਵੱਸਦੇ ਪਰਵਾਸੀਆਂ ਨੇ ਆਵਾਸ ਨੂੰ ਵਧਾਉਣ, ਨਸਲੀ ਵਿਤਕਰੇ ਦੀਆਂ ਵਧ ਰਹੀਆਂ ਘਟਨਾਵਾਂ ਨੂੰ ਸਖ਼ਤੀ ਨਾਲ ਰੋਕਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਆਸਟਰੇਲੀਆ ਦੀ ਬੁਨਿਆਦ ਹੀ ਆਵਾਸ ਨਾਲ ਜੁੜੀ ਹੈ, ਕਿਸੇ ਨੂੰ ਪਰਵਾਸੀ ਕਹਿ ਕੇ ਪੱਖਪਾਤ ਤੇ ਨਸਲੀ ਵਿਤਕਰਾ ਕਰਨਾ ਕਾਨੂੰਨ ਦੀ ਉਲੰਘਣਾ ਹੈ ।
