ਟੈਕਸਾਸ ਨੇੜੇ ਮੈਕਸੀਕਨ ਜਲ ਸੈਨਾ ਦਾ ਜਹਾਜ਼ ਹਾਦਸਾਗ੍ਰਸਤ; ਪੰਜ ਹਲਾਕ
ਮੈਕਸਿਕੋ ਦੇ ਜਲ ਸੈਨਾ ਸਕੱਤਰੇਤ ਨੇ ਦੱਸਿਆ ਕਿ ਇੱਕ ਮਿਸ਼ਨ ਦੌਰਾਨ ਗੈਲਵੈਸਟਨ ਨੇੜੇ ਟੈਕਸਾਸ ਤੱਟ ’ਤੇ ਇੱਕ ਛੋਟਾ ਮੈਕਸੀਕਨ ਜਲ ਸੈਨਾ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ ਜਿਸ ਕਾਰਨ ਪੰਜ ਜਣਿਆਂ ਦੀ ਮੌਤ ਹੋ ਗਈ। ਇਸ ਜਹਾਜ਼ ਵਿੱਚ ਅੱਠ ਜਣੇ ਸਵਾਰ ਸਨ ਜਿਨ੍ਹਾਂ ਵਿਚ ਚਾਰ ਜਲ ਸੈਨਾ ਮੁਲਾਜ਼ਮ ਅਤੇ ਚਾਰ ਆਮ ਜਣੇ ਸਨ। ਇਸ ਹਾਦਸੇ ਤੋਂ ਬਾਅਦ ਇੱਕ ਲਾਪਤਾ ਹੈ ਅਤੇ ਦੋ ਜਣੇ ਬਚ ਗਏ ਹਨ।
ਜਾਣਕਾਰੀ ਅਨੁਸਾਰ ਇਹ ਜਹਾਜ਼ ਵਿਸ਼ੇਸ਼ ਮੈਡੀਕਲ ਟਰਾਂਸਪੋਰਟ ਪ੍ਰਦਾਨ ਕਰਨ ਵਾਲੇ ਮਿਸ਼ਨ ’ਤੇ ਜਾ ਰਿਹਾ ਸੀ ਕਿ ਹਾਦਸਾਗ੍ਰਸਤ ਹੋ ਗਿਆ। ਮੈਕਸੀਕਨ ਅਥਾਰਟੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਜਾਂਚ ਕੀਤੀ ਜਾ ਰਹੀ ਹੈ।
